ട്രെയിനിൽ മാതാപിതാക്കളോടൊപ്പം ഉറങ്ങിക്കിടക്കുകയായിരുന്ന ഒരുവയസ്സുകാരിയെ തട്ടിക്കൊണ്ടുപോയി.
കുട്ടിയുമായി റെയിൽവേ സ്റ്റേഷന് പുറത്തിറങ്ങിയ പ്രതിയെ കണ്ട് സംശയം തോന്നിയ ഓട്ടോഡ്രൈവർമാരുടെ സമയോചിത ഇടപെടൽ രക്ഷയായി. ഒഡിഷ സ്വദേശികളായ മാനസ് – ഹമീസ ദമ്പതികളുടെ ഒരുവയസ്സുള്ള കുട്ടിയെ ആണ് ഇന്നലെ അർധരാത്രി തട്ടിക്കൊണ്ടുപോയത്. പ്രതിയായ തമിഴ്നാട് ഡിണ്ടിഗൽ സ്വദേശി വെട്രിവേലിനെ പൊലീസ് അറസ്റ്റ് ചെയ്തു.
ടാറ്റ നഗർ എക്സ്പ്രസിൽ ഒഡിഷയിൽനിന്ന് ആലുവയിലേക്ക് വരികയായിരുന്നു ദമ്പതികൾ. കോച്ചിൽ അധികം യാത്രക്കാർ ഉണ്ടായിരുന്നില്ലെന്നും തങ്ങൾ ഉറങ്ങുകയായിരുന്നുവെന്നും കുട്ടിയുടെ പിതാവ് പറഞ്ഞു. ഇതിനിടെയാണ് വെട്രിവേൽ കുട്ടിയെ തട്ടിക്കൊണ്ട് പോയി പാലക്കാട് ഒലവക്കോട് സ്റ്റേഷനിൽ ഇറങ്ങിയത്. തൃശൂർ എത്തി ഉറക്കമുണർന്നപ്പോഴാണ് കുട്ടിയെ കാണാതായത് മാതാപിതാക്കൾ അറിഞ്ഞത്.
