Kerala
ട്രാക്ടർ ദേഹത്ത് പതിച്ചു; 28 വയസ്സുകാരന് ദാരുണാന്ത്യം
മാന്നാർ: പാടത്ത് നിലം ഒരുക്കുന്നതിനിടയിൽ ട്രാക്ടർ മറിഞ്ഞ് യുവാവ് മരിച്ചു. ചെന്നിത്തല പുഞ്ച നാലാം ബ്ലോക്കിലാണ് ട്രാക്ടർ മറിഞ്ഞ് പശ്ചിമ ബംഗാൾ സ്വദേശിയായ ഇക്രമുൽ ഹക്ക് (28) മരിച്ചത്. മാൾഡാ ജില്ലയിലെ റട്ട്‌വാ ബാറ്റ്നാ ബോംപാൽ സ്വദേശിയാണ് ഇക്രമുൽ ഹക്ക്.
ബുധനാഴ്ച വൈകിട്ട് നാല് മണിയോടെയാണ് സംഭവം. നാലാം ബ്ളോക്കിൽ കൈതകണ്ടം പാടത്ത് നിലം ഉഴുതുന്നതിനിടയിൽ ട്രാക്ടറിന്റെ ചക്രങ്ങൾ ചെളിയിൽ പുതഞ്ഞ് ചെരിഞ്ഞു. ട്രാക്ടർ ഓടിച്ചിരുന്ന ഇക്രമുൽ ഹക്ക് തലകുത്തി വീണ് ചെളിയിലേക്ക് താഴ്ന്ന് പോയി. പിന്നാലെ ഇയാളുടെ മുകളിലേക്ക് ട്രാക്ടർ വീഴുകയായിരുന്നു.
സമീപത്തെ പാടങ്ങളിൽ ഉണ്ടായിരുന്ന ട്രാക്ടർ ഡ്രൈവർമാരും മറ്റ് തൊഴിലാളികളും എത്തി ട്രാക്ടർ ഉയർത്തി ഇക്രമുല്‍ ഹക്കിനെ പുറത്തെടുത്തെങ്കിലും ജീവൻ രക്ഷിക്കാനായില്ല. മാന്നാർ പൊലീസ് സ്ഥലത്തെത്തി മൃതദേഹം മാവേലിക്കര ജില്ലാ ആശുപതി മോർച്ചറിയിലേക്ക് മാറ്റി.