Kerala
‘നവീന്‍ പാവത്താനായിരുന്നു’; കണ്ണൂര്‍ എഡിഎമ്മിന്റെ മരണത്തില്‍ വിങ്ങിപ്പൊട്ടി ദിവ്യ.എസ്.അയ്യര്‍
കണ്ണൂര്‍ എഡിഎമ്മായിരുന്ന നവീന്‍ ബാബുവിന്റെ പൊതുദര്‍ശന ചടങ്ങില്‍ വികാരഭരിതമായ രംഗങ്ങള്‍. വിതുമ്പിക്കരഞ്ഞാണ് മുന്‍ കളക്ടര്‍ ദിവ്യ എസ്.അയ്യര്‍ നവീന്‍ ബാബുവിന് അന്തിമോപചാരം അര്‍പ്പിച്ചത്. ‘നവീന്‍ ഒരു പാവത്താനായിരുന്നു. ഈ മരണം വിശ്വസിക്കാന്‍ കഴിയുന്നില്ലെ’ന്നും ദിവ്യ പ്രതികരിച്ചു.
“ഞങ്ങള്‍ ഒറ്റക്കുടുംബമായിരുന്നു. ഒരു വീട്ടില്‍ കഴിയുന്നത് പോലെയാണ് സംസാരിച്ചിരുന്നതും ഭക്ഷണം കഴിച്ചിരുന്നതും ജോലി ചെയ്തിരുന്നതും. ഞങ്ങളറിഞ്ഞ മനുഷ്യനെ കുറിച്ച് പ്രചരിക്കുന്ന കാര്യങ്ങളൊന്നും വിശ്വസിക്കാന്‍ കഴിയുന്നില്ല. ഒരു പാവത്താനാണ്. ഞങ്ങളുടെ കൂടെ നിര്‍ലോഭം പ്രവര്‍ത്തിച്ചയാളാണ്, ഒരു മനുഷ്യനെ പോലും കുത്തിനോവിക്കാനാവാത്ത ആരോടും മുഖം കറുപ്പിക്കാനാവാത്ത എപ്പോഴും ഒരു ചെറിയ മന്ദസ്മിതത്തോടെ മാത്രമായിരുന്നു നവീനെ കണ്ടിരുന്നത്. കാസര്‍കോട്ടേക്ക് ഡെപ്യൂട്ടി കളക്ടറായി പ്രൊമോഷന്‍ കിട്ടിയപ്പോള്‍ കലക്ടറേറ്റില്‍ വെച്ചാണ് അവസാനമായി നവീനെ കാണുന്നത്. നവീന്‍ ഇനിയില്ലെന്ന് വിശ്വസിക്കാന്‍ കഴിയുന്നില്ല”. – ദിവ്യ പറഞ്ഞു.
നവീന്‍ ബാബുവിന്റെ മരണവിവരം പുറത്തുവന്നപ്പോഴും വൈകാരികമായ കുറിപ്പ് ദിവ്യ സോഷ്യല്‍ മീഡിയയില്‍ പങ്കുവെച്ചിരുന്നു.