മുംബൈ: പ്രതിപക്ഷസഖ്യമായ ഇന്‍ഡ്യ മുന്നണിക്കെതിരെയും കോണ്‍ഗ്രസിനെതിരെയും വീണ്ടും ആരോപണവുമായി പ്രധാനമന്ത്രി നരേന്ദ്രമോദി. കോണ്‍ഗ്രസ് തങ്ങളുടെ ‘മൊഹബത് കി ദുകാന്‍’ വഴി തന്റെ വ്യാജ വീഡിയോ വില്‍ക്കുകയാണെന്ന് മോദി പറഞ്ഞു. ഇന്‍ഡ്യ മുന്നണിയും കോണ്‍ഗ്രസും തന്നെ നിരന്തരം അധിക്ഷേപിക്കുകയും തനിക്കെതിരെ തെറ്റായ ആരോപണങ്ങള്‍ ഉന്നയിക്കുകയും ചെയ്യുകയാണെന്നും അദ്ദേഹം മഹാരാഷ്ട്രയില്‍ പറഞ്ഞു.
രാജ്യത്തിന് വേണ്ടി ഒന്നും ചെയ്യാതെ അവര്‍ എന്നെ രാപകല്‍ അധിക്ഷേപിക്കുന്നു. എന്നെ മോശമാക്കി കാണിക്കുക എന്നത് മാത്രമാണ് അവരുടെ അജണ്ട. മോദി കോ മാരോ, മോദി കോ പീറ്റോ, മോദി കോ ഗലി ദോ എന്നാണ് അവര്‍ പറയുന്നത്. ബിജെപി നേതൃത്വത്തിലുള്ള മഹായുതി സഖ്യത്തിന്റെ ഭാഗമായി ഒസ്മാനാബാദില്‍ മത്സരിക്കുന്ന എന്‍സിപി സ്ഥാനാര്‍ത്ഥി അര്‍ച്ചന പാട്ടീലിനായി പ്രചാരണം നടത്തുന്ന വേളയിലായിരുന്നു മോദിയുടെ പ്രസംഗം. സത്യം പറയാന്‍ നിങ്ങള്‍ക്ക് ഇടമില്ലേയെന്നും മോദി ഇന്‍ഡ്യ സഖ്യത്തോട് ചോദിച്ചു.
