കണ്ണൂർ: എം വിജിൻ എംഎൽഎയും പൊലീസും തമ്മിലുണ്ടായ വാക്കേറ്റത്തിൽ കണ്ണൂർ ടൗൺ എസ് ഐക്കെതിരെ നടപടിക്ക് ശുപാർശ ചെയ്ത് അന്വേഷണ റിപ്പോർട്ട്. എ സി പി ടി കെ രത്നകുമാർ സിറ്റി പൊലീസ് കമ്മീഷണർക്ക് സമർപ്പിച്ച ആഭ്യന്തര അന്വേഷണ റിപ്പോർട്ടിലാണ് എസ് ഐക്കെതിരെയുള്ള നടപടി ശുപാർശ. കലക്ട്രേറ്റിലേക്ക് നടത്തിയ കെജിഎൻഎയുടെ മാർച്ച് തടയുന്നതിലും പൊലീസിന് ഗുരുതരമായ വീഴ്ച സംഭവിച്ചെന്ന് അന്വേഷണത്തിൽ കണ്ടെത്തിയിട്ടുണ്ട്.
കല്യാശ്ശേരി എംഎൽഎ എം വിജിനും പൊലീസും തമ്മിൽ ജനുവരി നാലിന് കണ്ണൂർ കലക്ടറേറ്റിൽ വെച്ചുണ്ടായ വാക്കേറ്റത്തിൽ ടൗൺ എസ് ഐ പി പി ഷമീലിനെതിരെ നടപടി ശുപാർശ ചെയ്ത് പൊലീസിന്റെ ആഭ്യന്തര അന്വേഷണ റിപ്പോർട്ട്. എസ് ഐ അപമര്യാദയായി പെരുമാറി എന്ന എം വിജിൻ എംഎൽഎയുടെ പരാതിയിൽ സിറ്റി പൊലീസ് കമ്മീഷണർ നിയോഗിച്ച അന്വേഷണത്തിലാണ് എസ്ഐക്കെതിരെ നടപടി ശുപാർശ ചെയ്തുകൊണ്ട് റിപ്പോർട്ട് സമർപ്പിച്ചത്.
