Kerala
കോട്ടയം നഗര മധ്യത്തിൽ മദ്യപസംഘത്തിന്‍റെ അഴിഞ്ഞാട്ടം: ജില്ലാ സിവിൽ ജഡ്ജിനു നേരെയും ചീത്ത വിളി; പോലീസ് എത്താൻ വൈകിയെന്നും ആരോപണം
കോട്ടയം: നഗര മധ്യത്തിൽ മദ്യപസംഘത്തിന്‍റെ അഴിഞ്ഞാട്ടം. ഇന്നലെ വൈകുന്നേരം 7.30 ഓടെ ഐസിഐസിഐ ബാങ്കിന്‍റെ കോട്ടയം ബ്രാഞ്ചിനു മുൻപിലായിരുന്നു സംഭവം. കാറിൽ മദ്യപിച്ചെത്തിയ യുവാക്കളുടെ സംഘം അക്രമം അഴിച്ചു വിടുകയായിരുന്നു.
ബാങ്കിനു മുൻപിലായി കാർ പാർക്കു ചെയ്തിരുന്ന ഇവർ ജീവനക്കാരെയും സമീപത്തുണ്ടായിരുന്ന ആളുകളെയും ചീത്ത വിളിച്ചു. സ്ത്രീകളടക്കം കടന്നു പോകുന്ന വഴിയിലാണ് യുവാക്കൾ അഴിഞ്ഞാ‌ടിയത്. ഇത് ചോദ്യം ചെയ്യാനെത്തിയ ബാങ്ക് ജീവനക്കാരനെ ഇവർ മർദ്ദിക്കുകയും ചെയ്തു. വനിത ജീവനകാർക്കു നേരെയും ചീത്ത വിളിയുണ്ടായി.
മൂന്നു പേരാണ് കാറിലുണ്ടായിരുന്നത്. ഇതിൽ ഒരാൾ പെൺക്കുട്ടിയാണ്. മദ്യലഹരിയിലായിരുന്നു സംഘമെന്നും ദൃക്സാക്ഷികൾ പറഞ്ഞു. സംഭവ സമയത്ത് ജില്ലാ സിവിൽ ജഡ്ജ് സ്വന്തം വാഹനത്തിൽ സ്ഥലത്തുണ്ടായിരുന്നു. ജഡ്ജിനു നേരെയും യുവാവ് അസഭ്യ വർഷം നടത്തി. തുടർന്ന് ബാങ്ക് ജീവനക്കാർ കൺട്രോൾ റൂമിൽ വിവരം അറിയിച്ചു. പോലീസ് എത്തുമെന്ന് മനസിലാക്കിയതോ‌ടെ യുവാക്കൾ വാഹനം തള്ളി സ്റ്റാർട്ടാക്കി സ്ഥലത്തു നിന്ന് കടന്നുകളഞ്ഞു. വെസ്റ്റ് പോലീസ് സ്ഥലത്തെത്തി.