മന്ത്രി സജി ചെറിയാനെതിരെ ആഞ്ഞടിച്ച് ദീപിക എഡിറ്റോറിയല്‍. കഞ്ചാവ് കേസില്‍ പ്രതിയായ യു.പ്രതിഭ എംഎല്‍എയുടെ മകനെ രക്ഷിക്കാന്‍ മന്ത്രി നടത്തിയ പ്രസ്താവന സകല സാന്മാര്‍ഗിക അതിരുകളും ഭേദിച്ചുവെന്നാണ് ദീപിക കുറ്റപ്പെടുത്തുന്നത്. എംഎൽഎയുടെ കാര്യത്തിലേ മന്ത്രിക്കു വിഷമമുള്ളൂ. എംഎൽഎയെ ആശ്വസിപ്പിക്കാനും പിന്തുണയ്ക്കാനും സജി ചെറിയാന് അവകാശമുണ്ട്. കുറ്റക്കാരെ ന്യായീകരിക്കാന്‍ കുറ്റത്തെ നിസാരവത്ക്കരിക്കുകയാണ് മന്ത്രി ചെയ്തത്.
പുകവലിയെ ന്യായീകരിക്കാന്‍ എംടിയെ വരെ കൂട്ടുപിടിച്ചു. എംടിയുടെ മഹത്വം അദ്ദേഹത്തിന്‍റെ എഴുത്തിന്‍റെ പ്രതിഭയിലാണ് അല്ലാതെ പുകവലിയിലല്ല. ഇത്തരം താരതമ്യങ്ങൾ കുബുദ്ധിയാണ്. ‘വിഷപ്പുകയും വിവരക്കേടും’ എന്ന തലക്കെട്ടിലുള്ള എഡിറ്റോറിയലില്‍ ദീപിക പറയുന്നു.
‘കൊച്ചുകുട്ടികളല്ലേ, അവർ കമ്പനി കൂടും, സംസാരിക്കും; ചിലപ്പോൾ പുകവലിക്കും’. കേരളത്തിന്‍റെ സാംസ്കാരിക മന്ത്രി ഈ വാക്കുകളിലൂടെ ആപത്കരമായൊരു സംസ്കാരത്തെയാണ് നിസാരവത്കരിച്ചിരിക്കുന്നത്. മയക്കുമരുന്ന് ഉപയോഗിക്കുന്ന കുട്ടികള്‍ അവരുടെതന്നെ ആയുസിനും കുടുംബത്തിന്‍റെയും സമൂഹത്തിന്‍റെയും സമാധാനത്തിനും ഭീഷണിയായിരിക്കുന്ന കാലമാണിത്. പാർട്ടിയിലെ ഒരു എംഎൽഎ വേട്ടയാടപ്പെടുമ്പോള്‍ നോക്കിനിൽക്കാനാകില്ലെന്ന് പറഞ്ഞാണ് മന്ത്രിയുടെ ന്യായീകരണം. പ്രതികൾ പാർട്ടിക്കാരാണെങ്കിൽ കാഴ്ചക്കാരാകാതെ സംരക്ഷകരാകുന്ന നിലപാട്! ഇതു നാടിനു ശിക്ഷയാണ്. മയക്കുമരുന്നിന്‍റെ കാര്യത്തിലെങ്കിലും രാഷ്‌ട്രീയവും മതവും കലർത്തരുത്. ഏതു രാജാവിന്‍റെ മകനാണെങ്കിലും, നാർകോട്ടിക്സ് ഈസ് എ ഡെർട്ടി ബിസിനസ്’- ദീപിക എഴുതി.
