രണ്ട് മക്കളെ കൊലപ്പെടുത്തി രാജ്യം വിട്ട അമേരിക്കൻ യുവതി അറസ്റ്റിൽ

കൊളറാഡോ: രണ്ട് മക്കളെ കൊലപ്പെടുത്തി രാജ്യം വിട്ട അമേരിക്കൻ യുവതി അറസ്റ്റിൽ. അമേരിക്കയിലെ കൊളറാഡോ സ്വദേശിനിയായ കിംബെർലി സിംഗ്ലർ എന്ന മുപ്പത്തഞ്ചുകാരിയാണ് ലണ്ടനിൽ നിന്നും അറസ്റ്റിലായത്. തന്റെ ഒമ്പത് വയസുകാരിയായ മകളെയും ഏഴുവയസുള്ള മകനെയും കൊലപ്പെടുത്തുകയും 11 വയസുള്ള മകളെ കൊലപ്പെടുത്താൻ ശ്രമിക്കുകയും ചെയ്തു എന്നാണ് യുവതിക്കെതിരെ ചുമത്തിയിട്ടുള്ള കുറ്റം.

ഡിസംബർ 19ന് യുവതി പൊലീസ് സഹായം തേടിയതോടെയാണ് സംഭവങ്ങളുടെ തുടക്കം. വീട്ടിലേക്ക് മോഷ്ടാക്കൾ അതിക്രമിച്ച കയറി മക്കളേയും തന്നേയും ആക്രമിച്ചെന്നായിരുന്നു യുവതി ഫോണിലൂടെ പൊലീസിനോട് പറഞ്ഞത്. പൊലീസ് സ്ഥലത്ത് എത്തുമ്പോൾ 9 വയസുകാരിയായ മകളും 7 വയസുകാരനായ മകനും മരിച്ച നിലയിലും 11കാരിയായ മകളും യുവതിയും പരിക്കേറ്റ നിലയിലുമാണ് കണ്ടെത്തിയത്.

എന്നാൽ മോഷണം നടന്നതായ പരാതിയെ പിന്തുടർന്ന് നടത്തിയ അന്വേഷണത്തിലാണ് സംഭവത്തിൽ 35കാരിയായ കിംബെർലി സിംഗ്ലറിന്റെ പങ്ക് വ്യക്തമായത്. മോഷണം സംബന്ധിച്ച അന്വേഷണത്തിന്റെ ആദ്യഘട്ടത്തിൽ പൊലീസിനോട് സഹകരിച്ച ഇവരെ പിന്നീട് ബന്ധപ്പെടാനുള്ള ശ്രമങ്ങൾ നടന്നിരുന്നില്ല. ഇതിന് പിന്നാലെയാണ് വീട്ടിൽ മോഷണം നടന്നിട്ടില്ലെന്നും കുട്ടികളെ കൊലപ്പെടുത്തിയത് യുവതിയാണെന്നും പൊലീസിന് വ്യക്തമായത്.

പിന്നാലെ തന്നെ യുവതിക്കതിരെ അറസ്റ്റ് വാറൻറ് പുറത്തിറക്കുകയായിരുന്നു. ഇവരുടെ 11കാരിയായ മകൾ പരിക്കുകൾ ഭേദമായി ആശുപത്രി വിട്ടിരുന്നു. യുവതിയോടൊപ്പമല്ല ഈ കുഞ്ഞുള്ളതെന്ന് പൊലീസ് വിശദമാക്കി. അന്വേഷണത്തിനിടെ രാജ്യം വിട്ട യുവതിയെ ലണ്ടനിൽ നിന്നാണ് അറസ്റ്റ് ചെയ്തത്. കുട്ടികളെ കൊലചെയ്യാനുള്ള കാരണമെന്താണെന്ന് കണ്ടെത്താനുള്ള ശ്രമത്തിലാണ് പൊലീസുള്ളത്.