പട്ന: ബിഹാറിലെ ലഖിസരായിയിൽ അമിതവേഗതയിൽ വന്ന ട്രക്ക് ഓട്ടോറിക്ഷയുമായി കൂട്ടിയിടിച്ചുണ്ടായ അപകടത്തിൽ ഒമ്പത് പേർ മരിച്ചു. ആറ് പേർക്ക് പരിക്കേറ്റു. പട്ന മെഡിക്കൽ കോളജ് ആശുപത്രിയിൽ പ്രവേശിപ്പിച്ചു. മുംഗേർ ജമൽപുർ സ്വദേശികളായ പാചക തൊഴിലാളികളാണ് മരിച്ചത്. സിക്കന്ത്രയിൽ പാചകജോലി കഴിഞ്ഞ് രാത്രി ലഖിസരായി റെയിൽവേ സ്റ്റേഷനിലേക്കു പോവുകയായിരുന്നു സംഘം.
ഓട്ടോയിലിടിച്ച ട്രക്ക് പൊലീസ് പിടികൂടിയെങ്കിലും ഡ്രൈവർ കടന്നുകളഞ്ഞു. മരിച്ച ഒമ്പതുപേരിൽ എട്ടുപേരും മുൻഗർ ജില്ലയിലെ ജമാൽപൂർ നിവാസികളാണ്. ഒരു വിവാഹ ചടങ്ങിന് ശേഷം സിക്കന്ദ്ര ഗ്രാമത്തിൽ നിന്ന് ലഖിസാരായി സ്റ്റേഷനിലേക്ക് പോകുകയായിരുന്നു. ഇവരിൽ എട്ടുപേർ സംഭവസ്ഥലത്തുവച്ചും ഡ്രൈവർ മനോജ് കുമാർ ആശുപത്രിയിൽ വച്ചും മരിച്ചതായി പൊലീസ് പറഞ്ഞു.
മുഖ്യമന്ത്രി നിതീഷ് കുമാർ കുടുംബാംഗങ്ങളെ അനുശോചനം അറിയിക്കുകയും പരിക്കേറ്റവർക്ക് മികച്ച വൈദ്യസഹായം ലഭ്യമാക്കാൻ ഉദ്യോഗസ്ഥർക്ക് നിർദേശം നൽകുകയും ചെയ്തു.
