കൊല്ലം: ശാസ്താംകോട്ടയില്‍ സ്കൂട്ടറില്‍ കറങ്ങി നടന്ന് മദ്യ വില്‍പ്പന നടത്തിവന്നയാളെ 19.625 ലിറ്റർ ഇന്ത്യൻ നിർമ്മിത വിദേശ മദ്യവുമായി അറസ്റ്റ് ചെയ്തു. പോരുവഴി സ്വദേശി കൃഷ്ണകുമാർ (37 വയസ്) ആണ് വീട്ടില്‍ സൂക്ഷിച്ചിരുന്ന മദ്യ ശേഖരവുമായി പിടിയിലായത്. കൂടാതെ ഇയാളില്‍ നിന്നും 750 ഗ്രാം നിരോധിത പുകയില ഉല്‍പ്പന്നങ്ങള്‍ കണ്ടെത്തി പിഴ ഈടാക്കുകയും ചെയ്തു.
ശാസ്താംകോട്ട എക്സൈസ് റേഞ്ച് ഇൻസ്‌പെക്ടർ എൻ.അബ്ദുള്‍ വഹാബിന്റെ നേതൃത്വത്തില്‍ എക്സൈസ് സംഘം ഇയാളെ പിടികൂടാനായി വീട്ടില്‍ എത്തുകയായിരുന്നു. എക്സൈസ് സംഘത്തെ കണ്ട ഉടനെ കൃഷ്ണകുമാർ വീടിനകത്ത് കയറി വാതില്‍ അടച്ച്‌ അകത്തിരുന്നു. ഇതിനിടെ വീടിന് പുറത്ത് നിർത്തിയിട്ടിരുന്ന സ്കൂട്ടറിന്റെ ബോക്സ് പരിശോധിച്ചപ്പോള്‍ മദ്യം കണ്ടെത്തി.
വാതില്‍ തുറക്കാൻ തയ്യാറാവാതിരുന്നതോടെ എക്സൈസ് സംഘം വാതില്‍ പൊളിച്ച്‌ അകത്ത് കടക്കുകയായിരുന്നു. വീട്ടില്‍ നിന്ന് 19.625 ലിറ്റർ മദ്യവും നിരോധിത പുകയില ഉത്പന്നങ്ങളും പിടിച്ചെടുത്തു. അനധികൃത മദ്യ വില്‍പ്പന നടത്താൻ ഉപയോഗിച്ചിരുന്ന സ്കൂട്ടറും എക്സൈസ് കസ്റ്റഡിയിലെടുത്തു.
