പാലക്കാട്: ലോക്സഭാ തിരഞ്ഞെടുപ്പിൽ മുൻ കോൺഗ്രസ് നേതാവ് എ വി ഗോപിനാഥന്റെ പിന്തുണ ഇടതുപക്ഷത്തിന്. പെരിങ്ങോട്ടുകുറിശ്ശിയിൽ നടത്തിയ രാഷ്ട്രീയ പൊതുയോഗത്തിലായിരുന്നു നിലപാട് പ്രഖ്യാപനം. ആലത്തൂർ മണ്ഡലത്തിലെ പെരിങ്ങോട്ടുകുറുശ്ശിയിലെ വോട്ടുകളിൽ ഏറെ സ്വാധീനമുള്ള നേതാവാണ് മുൻ കോൺഗ്രസ് എംഎൽഎയായ എ വി ഗോപിനാഥ്. കോൺഗ്രസിനകത്തെ വിഭാഗീയതയെ തുടർന്നാണ് എ വി ഗോപിനാഥ് മുമ്പ് കോൺഗ്രസ് വിട്ടത്.
പെരിങ്ങോട്ടുകുറിശ്ശി ഗ്രാമപഞ്ചായത്തിലെ കോൺഗ്രസ് അംഗങ്ങളും എ വി ഗോപിനാഥൻ്റെ നിലപാടിനൊപ്പം ആണെന്നും പ്രഖ്യാപിച്ചു. പതിറ്റാണ്ടുകളായി കോൺഗ്രസാണ് പെരിങ്ങോട്ടുകുറിശ്ശി ഗ്രാമപഞ്ചായത്ത് ഭരിക്കുന്നത്. ആലത്തൂർ ലോക്സഭ മണ്ഡലം സ്ഥാനാർത്ഥി കെ രാധാകൃഷ്ണൻ, ഗോപിനാഥനെ നേരിട്ട് കണ്ട് പിന്തുണ തേടിയിരുന്നു. വാർഡ് തലത്തിൽ ജനങ്ങളുടെ അഭിപ്രായം തേടിയ ശേഷമാണ് ഗോപിനാഥിന്റെ നിലപാട് പ്രഖ്യാപനം.
