കോഴിക്കോട്: ഐസിയു പീഡന കേസിലെ അതിജീവിതയുടെ സമരം ഇന്നും തുടരും. കോഴിക്കോട് സിറ്റി പൊലീസ് കമ്മീഷണർ ഓഫീസിന്റെ മുൻപിൽ തെരുവിലാണ് സമരം നടത്തുന്നത്. ഡോക്ടർ പ്രീതിയ്ക്കെതിരെയുള്ള പരാതിയിലെ അന്വേഷണ റിപ്പോർട്ട് ലഭിക്കുന്നതുവരെ സമരം തുടരാനാണ് അതിജീവിതയുടെ തീരുമാനം.
റിപ്പോർട്ട് തേടി ഉത്തര മേഖല ഐജിയെ ഇന്നലെ വീണ്ടും അതിജീവിത കണ്ടെങ്കിലും എന്ന് ലഭ്യമാക്കുമെന്ന കാര്യത്തില്‍ ഉറപ്പൊന്നും കിട്ടിയിരുന്നില്ല. ഐജിയെ കീഴുദ്യോഗസ്ഥർ തെറ്റിദ്ധരിപ്പിച്ചെന്നും അവർ ആരോപിച്ചു. റിപ്പോർട്ട് ഉടൻ നൽകുമെന്ന ഉറപ്പ് ഐജി നൽകിയതിന് പിന്നാലെ നേരത്തേ നടത്തിയ സമരം അവസാനിപ്പിച്ചിരുന്നു. എന്നാൽ ഉറപ്പ് പാലിക്കാതിരുന്നതോടെയാണ് സമരം പുനരാരംഭിച്ചത്. ഡോക്ടർ കെ വി പ്രീത വൈദ്യ പരിശോധന കൃത്യമായി നടത്താതെ കേസ് അട്ടിമറിച്ചു എന്നാണ് അതിജീവിതയുടെ പരാതി.
