തിരുവനന്തപുരം: ബോർഡ് കോർപ്പറേഷന്‍ സ്ഥാനങ്ങളിലേക്ക് നാണു വിഭാഗം നേതാക്കളെ പരിഗണിക്കണമെന്ന് ആവശ്യപ്പെട്ട് എൽഡിഎഫ് നേതൃത്വത്തിന് വീണ്ടും സി കെ നാണുവിന്റെ കത്ത്. മാത്യു ടി തോമസിന്‍റെയും കെ കൃഷ്ണന്‍കുട്ടിയുടെയും കൂടെയുള്ളവരെ മാറ്റണമെന്ന് കത്തിലൂടെ ആവശ്യപ്പെടുന്നു. മുന്നണി നേതൃത്വം എന്ത് നിലപാട് സ്വീകരിക്കുമെന്നത് മാത്യു ടി തോമസിനും, കെ കൃഷ്ണന്‍കുട്ടിക്കും നിർണായകമാണ്.
തങ്ങളാണ് യഥാർത്ഥ ജെഡിഎസ് എന്ന് കാട്ടിയും എല്‍ഡിഎഫ് നേതൃത്വത്തിന് സികെ നാണു നേരത്തെ കത്ത് നല്‍കിയിരുന്നു. ഇത് മുന്നണി നേതൃത്വം ഇതുവരെ പരിഗണിച്ചിട്ടില്ല. ഇതിനിടയിലാണ് മറ്റൊരു കത്ത് കൂടി നല്‍കിയത്. ജെഡിഎസ് സംസ്ഥാന അധ്യക്ഷ സ്ഥാനത്ത് നിന്ന് മാത്യു ടി തോമസിനെ നീക്കം ചെയ്തതായി സി കെ നാണു പ്രഖ്യാപിക്കുകയും ചെയ്തു.
