ഗുരുഗ്രാം: ഫുട്‌ബോള്‍ കളിക്കിടെ മകനോട് വഴക്കിട്ട 12കാരനെ തോക്ക് ചൂണ്ടി പേടിപ്പിച്ച് പിതാവ്. മദ്യവ്യാപാരിയായ പ്രതീക് സച്‌ദേവാണ് മകനോടൊപ്പം ഫുട്‌ബോള്‍ കളിച്ച 12കാരന്റെ നേരെ തോക്ക് ചൂണ്ടിയത്. സച്‌ദേവിന്റെ ഭാര്യ ഓടിവന്ന് ഇയാളെ തള്ളിയിട്ടതിനെ തുടര്‍ന്ന് വലിയൊരു അപകടം ഒഴിവായി.
12കാരന്റെ കുടുംബത്തിന്റെ പരാതിയില്‍ സച്‌ദേവിനെ പൊലീസ് അറസ്റ്റ് ചെയ്ത് ജാമ്യത്തില്‍ വിട്ടു. ഭാരതീയ ന്യായ സംഹിതയിലെയും ആയുധ നിയമത്തിലെയും വിവിധ വകുപ്പുകള്‍ ചുമത്തിയാണ് കേസെടുത്തത്. ഇയാളുടെ ലൈസന്‍സുള്ള റിവോള്‍വറും പൊലീസ് കണ്ടുകെട്ടിയിട്ടുണ്ട്. അന്വേഷണം പുരോഗമിക്കുകയാണ്. ഗുരുഗ്രാമിലെ ലഗൂണ്‍ അപ്പാര്‍ട്‌മെന്റിലെ ഡിഎല്‍എഫ് ഫേസ് 3യിലെ സിസിടിവിയില്‍ സംഭവം പതിഞ്ഞിരുന്നു.
