പിടികൂടിയ മൂർഖൻ പാമ്പിനെ തുറന്നു വിടുന്നതിനിടെ കടിയേറ്റ വനം വകുപ്പ് സർപ്പ ലൈസൻസ്ഡ് വൊളൻറിയർ ചികിത്സയിലിരിക്കെ മരിച്ചു. കരമന വാഴവിള സ്വദേശിയായ പ്രശാന്ത് (ഷിബു-39) ആണ് മെഡിക്കൽ കോളേജ് ആശുപത്രിയിൽ ചികിത്സയിലിരിക്കുമ്പോൾ മരിച്ചത്. കഴിഞ്ഞ ഞായറാഴ്ച ഉച്ചകഴിഞ്ഞ് 3 മണിയോടെയായിരുന്നു ഷിബുവിന് കടിയേറ്റത്.
പലയിടത്തുനിന്നായി രക്ഷപ്പെടുത്തിയ അണലിയും മൂർഖനും ഉൾപ്പെടെയുള്ള പാമ്പുകളുമായി ഷിബുവും സഹപ്രവർത്തകനായ ബിജുവും പരുത്തിപ്പള്ളി റെയ്ഞ്ച് ആർആർ ടീമിനൊപ്പം പൊന്മുടിയിലെത്തിയാതായിരുന്നു. പാമ്പിനെ തുറന്നുവിടാനായി ബാഗ് തുറന്നപ്പോൾ ഷിബുവിന്റെ കയ്യിൽ മൂർഖൻ കടിക്കുകയായിരുന്നു.
