കോട്ടയം: പൊലീസ് അസോസിയേഷൻ സമ്മേളനത്തിൽ നേട്ടങ്ങളെണ്ണിപ്പറഞ്ഞ് എഡിജിപി എം ആർ അജിത് കുമാർ. കേരള പൊലീസിലെ പല മാറ്റങ്ങൾക്കും താൻ കാരണക്കാരൻ ആയിട്ടുണ്ടെന്നും സേനയിലെ തന്റെ 29-ാം വർഷമാണിതെന്നും അദ്ദേഹം പറഞ്ഞു.
പൊലീസിന് നേരെ ആർക്കും എന്തും ചെയ്യാവുന്ന അവസ്ഥയാണ് ഇപ്പോഴെന്നും അജിത് കുമാർ കൂട്ടിച്ചേർത്തു. സിവിൽ പൊലീസ് ഓഫീസർ എന്ന പേര് താൻ കൊണ്ടു വന്നതാണെന്ന് പറഞ്ഞ എഡിജിപി മുഖ്യമന്ത്രിയെ പുകഴ്ത്താനും മറന്നില്ല. സേനയിലെ അംഗബലം കൂട്ടിയെന്നും പൊലീസ് സേനയോട് കഴിഞ്ഞ എട്ട് വർഷവും മുഖ്യമന്ത്രിക്ക് അനുഭാവ പൂർവമായ നിലപാടാണെന്നും അദ്ദേഹം പറഞ്ഞു. കേരള പൊലീസിലെ പല മാറ്റങ്ങൾക്കും താൻ കാരണക്കാരൻ ആയിട്ടുണ്ട്. ഇതൊക്കെ ഇനി പറയാൻ അവസരം ഉണ്ടാകുമോ എന്ന് അറിയില്ലെന്നും അജിത് കുമാർ പറഞ്ഞു.
‘ജനങ്ങൾക്ക് പൊലീസിൽ വലിയ വിശ്വാസമുണ്ട്. ആ വിശ്വാസം നിലനിർത്താൻ ഞാനും നിങ്ങളും ഉത്തരവാദപ്പെട്ടവർ ആണ്. സർക്കാരിനും ജനങ്ങൾക്കും വേണ്ടി പ്രവർത്തിക്കണം’, അജിത് കുമാർ കൂട്ടിച്ചേർത്തു.
