Kerala
രാത്രി എസ് എഫ് ഐ;പകൽ കെ എസ് യു ആയ നേതാവിനെ ജില്ലാ വൈസ് പ്രസിഡണ്ട് ആക്കിയതിൽ പ്രതിഷേധിച്ച് പാലക്കാട് കെ എസ് യു വിൽ കൂട്ടരാജി
പാലക്കാട് കെഎസ്‌യുവില്‍ കൂട്ടരാജി. കെ.എസ്.യു ജില്ലാ പ്രസിഡണ്ട് നിഖില്‍ കണ്ണാടി ഉൾപ്പടെയുള്ള 26 ഓളം പേരാണ് പാലക്കാട് ജില്ലാ കമ്മറ്റിയില്‍ നിന്ന് രാജിവച്ചിരിക്കുന്നത് .ഇബ്രാഹിം ബാദുഷയെ വൈസ് പ്രസിഡന്റ് ആക്കിയതിനെതിരെയാണ് രാജിവച്ച് പ്രതിഷേധിച്ചിരിക്കുന്നത്.
കാലിക്കറ്റ് സര്‍വകലാശാല തെരഞ്ഞെടുപ്പില്‍ ഉള്‍പ്പെടെ എസ്എഫ്‌ഐയ്ക്ക് സഹായം നല്‍കിയെന്ന് ആരോപണം നേരിട്ടയാളാണ് ഇബ്രാഹിം ബാദുഷ. ഇയാള്‍ എസ്എഫ്‌ഐയെ സഹായിച്ചതിനുള്ള തെളിവുകള്‍ ഉള്‍പ്പെടെയുണ്ടായിട്ടും വൈസ് പ്രസിഡന്റായി നിയമിച്ചെന്നാണ് രാജി വച്ച കെഎസ്‌യു നേതാക്കള്‍ പറയുന്നത്.
പുനസംഘടനാ ലിസ്റ്റ് വന്നതോടെയാണ് പ്രധാന നേതാക്കള്‍ ഉള്‍പ്പെടെ രാജി സന്നദ്ധത അറിയിച്ചത്.സംഘടനയെ തോല്‍പ്പിക്കാന്‍ ശ്രമിച്ചയാളെ ഉന്നത സ്ഥാനത്തേക്ക് കൊണ്ടുവരുന്നത് അനുവദിക്കാന്‍ കഴിയില്ലെന്നും രാജി സന്നദ്ധത അറിയിച്ച നേതാക്കള്‍ മാധ്യമങ്ങളോട് പറഞ്ഞു.