കോട്ടയം : കോട്ടയത്തിൻ്റെ കോട്ട കാക്കുവാൻ യു ഡി എഫ് സ്ഥാനാർഥി അഡ്വ.കെ. ഫ്രാൻസിസ് ജോർജ് നാമനിർദ്ദേശപത്രിക സമർപ്പിച്ചു. ആയിരക്കണക്കിന് പ്രവർത്തകരുടെ ആർപ്പുവിളികളെ സാക്ഷിയാക്കി യു ഡി എഫ് കേന്ദ്ര ഇലക്ഷൻ കമ്മറ്റി ഓഫീസിൽ നിന്നും യാത്ര തിരിച്ച സ്ഥാനാർഥി യു ഡി എഫ് കേന്ദ്ര ഇലക്ഷൻ കമ്മറ്റി ചെയർമാൻ അഡ്വ. തിരുവഞ്ചൂർ രാധാകൃഷ്ണൻ എം എൽ എ ,ജനറൽ കൺവീനർ അഡ്വ.മോൻസ് ജോസഫ് എംഎൽഎ, ഡിസിസി പ്രസിഡണ്ട് നാട്ടകം സുരേഷ്, മുസ്ലിം ലീഗ് ജില്ലാ പ്രസിഡണ്ട് അസീസ് ബഡായി എന്നിവർക്കൊപ്പമാണ് കളക്ടേറ്റിൽ നാമനിർദേശപത്രികസമർപ്പിക്കാനെത്തിയത്.വരണാധികാരിയായ ജില്ലാ കളക്ടർ വി.വിഗ്നേശ്വരി മുൻപാകെ ഇന്ന് ( 04/04/24) ഉച്ചയ്ക്ക് 12ന് മൂന്ന് സെറ്റ് പത്രിക സമർപ്പിച്ചു.
യു ഡി എഫ് കേന്ദ്ര ഇലക്ഷൻ കമ്മറ്റി ചെയർമാൻ അഡ്വ.തിരുവഞ്ചൂർ രാധാകൃഷ്ണൻ എം.എൽ.എ, ജനറൽ കൺവീനർ അഡ്വ.മോൻസ് ജോസഫ് എം. .എൽ.എ , എം എൽ എ മാരായ അഡ്വ.അനൂപ് ജേക്കബ്, മാണി സി.കാപ്പൻ, ചാണ്ടി ഉമ്മൻ, മുൻ എംപി ജോയി എബ്രഹാം, ഡിസിസി പ്രസിഡണ്ട് നാട്ടകം സുരേഷ് ,യു ഡി എഫ് ജില്ലാ കൺവീനർ അഡ്വ.ഫിൽസൺ മാത്യൂസ്, കേരള കോൺഗ്രസ് ഉന്നതാധികാര സമിതിയംഗം അഡ്വ.പ്രിൻസ് ലൂക്കോസ് ,കുര്യൻ ജോയി ,എന്നിവർ നാമനിർദ്ദേശ പത്രികയിൽ സ്ഥാനാർഥിയെ പിന്തുണച്ചു.
പത്രിക സമർപ്പണത്തിനു ശേഷം കളക്ട്രേറ്റിനു സമീപം പി.ജെ ടിംബേഴ്സിനു മുന്നിൽ നിന്നും ഗാന്ധി സ്ക്വയറിലേക്ക് പ്ലക്കാർഡുകൾ ഏന്തിയ ആയിരക്കണക്കിന് പ്രവർത്തകർ അണിനിരന്ന റോഡ് ഷോ നടത്തി.
