കേരളത്തിന് വീണ്ടും വന്ദേഭാരത്; എറണാകുളം – ബെംഗളൂരു സർവീസിന് സാധ്യത തെളിയുന്നു

എറണാകുളം: കേരളത്തിൽ നിന്നും ബെം​ഗളുരുവിലേക്ക് വന്ദേഭാരത് ട്രെയിൻ സർവീസ് എന്ന ആവശ്യത്തിന് വീണ്ടും ജീവൻവെക്കുന്നു. ആലപ്പുഴ വഴിയുള്ള തിരുവനന്തപുരം – കാസർകോട് വന്ദേഭാരത് മംഗളൂരുവിലേക്കു നീട്ടാൻ റെയിൽവേ തീരുമാനിച്ചതോടെയാണ് സംസ്ഥാനത്തിന് വീണ്ടും ഒരു വന്ദേഭാരത് സർവീസിനുള്ള സാധ്യത തെളിയുന്നത്. തിരുവനന്തപുരം – കാസർകോട് വന്ദേഭാരത് മം​ഗളുരുവരെ നീട്ടുന്നതോടെ തിരുവനന്തപുരം ഡിവിഷന്റെ പക്കലുള്ള വന്ദേഭാരത് സ്പെയർ ട്രെയിൻ ഉപയോഗിച്ച് എറണാകുളം – ബെംഗളൂരു സർവീസ് ആരംഭിക്കാമെന്നാണ് ചൂണ്ടിക്കാട്ടുന്നത്. എറണാകുളം–ബെംഗളൂരു റൂട്ടിൽ വന്ദേഭാരത് എന്ന ആവശ്യം കേരളം ആദ്യംമുതലേ ഉയർത്തുന്നുണ്ട്.

കാസർകോട് ട്രെയിൻ മംഗളൂരുവിലേക്കു നീട്ടുന്നതോടെ ട്രെയിനിന്റെ തിരുവനന്തപുരത്തെ അറ്റകുറ്റപ്പണിയും അവിടേക്കു മാറും. ഇതോടെ സ്പെയർ റേക്ക് ഇല്ലാതെ സർവീസ് നടത്താൻ കഴിയുമെന്നാണ് ചൂണ്ടിക്കാട്ടുന്നത്. തിരുവനന്തപുരം ഡിവിഷന്റെ പക്കലുള്ള വന്ദേഭാരത് സ്പെയർ ട്രെയിൻ ഉപയോഗിച്ച് എറണാകുളം – ബെംഗളൂരു റൂട്ടിലോ കോയമ്പത്തൂർ – തിരുവനന്തപുരം റൂട്ടിലോ സർവീസ് തുടങ്ങിയേക്കുമെന്നും സൂചനകളുണ്ട്.

കേരളം ആദ്യം മുതൽ എറണാകുളം–ബെംഗളൂരു റൂട്ടിൽ വന്ദേഭാരത് ആവശ്യപ്പെടുന്നുണ്ടെങ്കിലും അറ്റകുറ്റപ്പണി സൗകര്യം ഇല്ലാതിരുന്നതിനാൽ പരിഗണിച്ചിരുന്നില്ല. വന്ദേഭാരത് അറ്റകുറ്റപ്പണിക്ക് ആവശ്യമായ വൈദ്യുതീകരിച്ച പിറ്റ്‌ലൈൻ എറണാകുളത്ത് വൈകാതെ കമ്മിഷൻ ചെയ്യും. ബെംഗളൂരു സർവീസിന്റെ ആവശ്യകത ബോധ്യപ്പെടുത്തി ഹൈബി ഈഡൻ എംപി റെയിൽവേ മന്ത്രിക്ക് കത്തു നൽകിയിട്ടുണ്ട്. പുലർച്ചെ 5ന് ബെംഗളൂരുവിൽനിന്നു പുറപ്പെടുന്ന തരത്തിൽ ട്രെയിനോടിക്കണമെന്നാണ് ആവശ്യം.

കോയമ്പത്തൂർ–തിരുവനന്തപുരം വന്ദേഭാരതിനായി പാലക്കാട് എംപി വി.കെ.ശ്രീകണ്ഠനും കോയമ്പത്തൂർ എംഎൽഎയും മഹിളാ മോർച്ച ദേശീയ പ്രസിഡന്റുമായ വാനതി ശ്രീനിവാസനും റെയിൽവേ മന്ത്രിയെ കണ്ടിട്ടുണ്ട്. കോയമ്പത്തൂരിൽ നിന്ന് തിരുവനന്തപുരത്തേക്കു പുലർച്ചെ 3ന് ഐലൻഡ് എക്സ്പ്രസ് പോയിക്കഴിഞ്ഞാൽ അടുത്ത പ്രതിദിന ട്രെയിൻ രാവിലെ 8നുള്ള ശബരി എക്സ്പ്രസാണ്.