Politics
മുഖ്യമന്ത്രിയുടെ ഓഫീസ് കൊള്ളക്കാരുടെ താവളം: കെ സുരേന്ദ്രന്‍
മലപ്പുറം: നിലമ്പൂര്‍ എംഎല്‍എ പി വി അന്‍വര്‍ ഉന്നയിച്ച ആരോപണങ്ങള്‍ സര്‍ക്കാര്‍ എന്തുകൊണ്ട് പരിശോധിക്കുന്നില്ലെന്ന് ബിജെപി സംസ്ഥാന അധ്യക്ഷന്‍ കെ സുരേന്ദ്രന്‍.
മന്ത്രിമാരുടെ ടെലിഫോണ്‍ ചോര്‍ത്തിയെന്ന പരാതിയില്‍ പോലും അന്വേഷണമില്ലെന്നും മുഖ്യമന്ത്രിയുടെ ഓഫീസ് കൊള്ളക്കാരുടെ താവളമാണെന്നും അദ്ദേഹം പറഞ്ഞു. മുഖ്യമന്ത്രിയുടെ പൊളിറ്റിക്കല്‍ സെക്രട്ടറി പി ശശിക്കെതിരെ ഉയര്‍ന്നിരിക്കുന്ന ആരോപണങ്ങളില്‍ മറുപടിയില്ലെന്നും അദ്ദേഹം ചൂണ്ടിക്കാട്ടി. മുഖ്യമന്ത്രി ജനങ്ങളുടെ മുന്നില്‍ വിവസ്ത്രനായെന്നും സുരേന്ദ്രന്‍ പരിഹസിച്ചു.
എല്‍ഡിഎഫിന്റെ ബി ടീമായി കഴിഞ്ഞ 8 വര്‍ഷമായി യുഡിഎഫ് പ്രവര്‍ത്തിക്കുന്നുവെന്ന് പറഞ്ഞ സുരേന്ദ്രന്‍ മുഖ്യമന്ത്രി രാജിവെക്കണമെന്നും ആവശ്യപ്പെട്ടു. തൃശൂരില്‍ സുരേഷ് ഗോപി വിജയിച്ചത് പൂരം കലക്കിയിട്ടല്ലെന്നും അദ്ദേഹം ആവര്‍ത്തിച്ചു. ‘തൃശൂരില്‍ സുരേഷ് ഗോപി ജയിച്ചത് പൂരം കലക്കിയിട്ടല്ല. ജനങ്ങളുടെ മനസ്സ് കീഴടക്കിയിട്ടാണ്. പൂരം കലക്കിയതില്‍ ബിജെപിക്ക് നേട്ടമുണ്ടെങ്കില്‍ രാജീവ് ചന്ദ്രശേഖര്‍ ജയിക്കില്ലേ?,’ അദ്ദേഹം പറഞ്ഞു.