Crime
വീട്ടിൽ അതിക്രമിച്ചു കയറി പെൺകുട്ടിക്ക് നേരെ പീഡനശ്രമം; രണ്ടുപേർ പിടിയിൽ
തിരുവനന്തപുരം: മംഗലപുരത്ത് പെൺകുട്ടിയെ വീട്ടിൽ കയറി പീഡിപ്പിക്കാൻ ശ്രമം. ഇന്നലെ ഉച്ചയ്ക്ക് പന്ത്രണ്ടു മണിക്കായിരുന്നു സംഭവം. പെൺകുട്ടിയുടെ വീടിന് സമീപം കേബിൾ ജോലിക്കെത്തിയ രണ്ട് യുവാക്കളാണ് കുട്ടിയെ ആക്രമിച്ചത്. നഴ്സിങ് വിദ്യാർഥിനിയായ 20 കാരിയെ കടന്ന് പിടിക്കുകയായിരുന്നു.
വീട്ടിൽ മറ്റാരുമില്ലെന്ന് മനസ്സിലാക്കിയ ഇവർ വാതിൽ തള്ളിത്തുറന്ന് അകത്തു കയറി അക്രമിക്കുകയായിരുന്നു. ബഹളം വച്ച പെൺകുട്ടിയുടെ വായിൽ പ്രതികൾതുണി തിരുകി കയറ്റി. തുടർന്ന് അക്രമികളെ തള്ളി മാറ്റിയ പെൺകുട്ടി വീടിന് പുറത്തേക്ക് ഓടി രക്ഷപെടുകയായിരുന്നു.
ബഹളം കേട്ട് നാട്ടുകാർ ഓടിക്കൂടിയപ്പോഴേക്കും പ്രതികൾ രക്ഷപെട്ടു. പെൺകുട്ടിയുടെ മൊഴിയുടെ അടിസ്ഥാനത്താൽ കൊല്ലം കൊട്ടിയം സ്വദേശികളായ രണ്ട് പേരെ മംഗലപുരം പൊലീസ് കസ്റ്റഡിയിലെടുത്തു. വിദ്യാർഥിനി ആശുപത്രിയിൽ ചികിത്സയിലാണ്