India
റിസർവ് ബാങ്ക് മുൻ ഗവർണർ സജീവ രാഷ്ട്രീയത്തിലേക്ക്
മുംബൈ: റിസർവ് ബാങ്ക് മുൻഗവർണർ രഘുറാം രാജൻ രാഷ്ട്രീയത്തിലിറങ്ങുന്നു. രഘുറാം രാജൻ കോൺഗ്രസിൽ ചേർന്നേക്കുമെന്നാണ് റിപ്പോർട്ട്. ദീർഘനാളായി കോൺഗ്രസുമായി അടുപ്പംപുലർത്തുന്നയാളാണ് രഘുറാം രാജൻ. മഹാരാഷ്ട്രയിലെ മഹാവികാസ് അഘാഡി സഖ്യത്തിന്റെ പൊതുസ്ഥാനാർത്ഥിയായി രാജ്യസഭയിലേക്ക് മത്സരിച്ചേക്കുമെന്നും റിപ്പോർട്ടുകളുണ്ട്. 2013-16 കാലത്ത് റിസർവ് ബാങ്ക് ഗവർണറായിരുന്ന രഘുറാം രാജൻ നരേന്ദ്രമോദിസർക്കാരിന്റെ കടുത്ത വിമർശകൻ കൂടിയാണ്.
കഴിഞ്ഞദിവസം മുൻ മുഖ്യമന്ത്രിയും ശിവസേന(യു.ബി.ടി.) നേതാവുമായ ഉദ്ധവ് താക്കറെയെ രഘുറാം രാജൻ സന്ദർശിച്ചിരുന്നു. 27-നാണ് രാജ്യസഭാ തിരഞ്ഞെടുപ്പ്. മഹാരാഷ്ട്രയിൽനിന്ന് ആറ് ഒഴിവുകളാണുള്ളത്. നിലവിലെ അംഗബലമനുസരിച്ച് 44 അംഗങ്ങളുള്ള കോൺഗ്രസിന് ഒരാളെ ജയിപ്പിക്കാനാവും. ഉദ്ധവ് ശിവസേനയ്ക്കും ശരദ്പവാർ വിഭാഗം എൻ.സി.പി.ക്കും അവരുടെ സ്ഥാനാർഥികളെ വിജയിപ്പിക്കാനുള്ള അംഗബലമില്ലാത്തതിനാൽ മഹാവികാസ് അഘാഡി അവരുടെ പൊതുസ്ഥാനാർഥിയായി രഘുറാം രാജനെ മത്സരിപ്പിച്ചേക്കുമെന്നാണ് സൂചന.