India
നിതീഷ് കുമാറിനെ വീണ്ടും എന്‍ഡിഎയില്‍ എത്തിക്കാനുള്ള നീക്കവുമായി ബിജെപി
ബീഹാര്‍ മുഖ്യമന്ത്രിയും ജെഡിയു ദേശീയ പ്രസിഡന്റുമായ നിതീഷ് കുമാറിനെ വീണ്ടും എന്‍ഡിഎയില്‍ എത്തിക്കാനുള്ള നീക്കം തീവ്രമാക്കി ബിജെപി. തിരക്കിട്ട ചര്‍ച്ചകള്‍ക്കാണ് ദില്ലി വേദിയാകുന്നത്. എന്ത് വില കൊടുത്തും നിതീഷിനെ പാളയത്തിലെത്തക്കാനുളള ശ്രമത്തിലാണ് ബിജെപിയെന്നാണ് റിപ്പോര്‍ട്ടുകള്‍.
ലോക്സഭാ തെരഞ്ഞെടുപ്പില്‍ ബീഹാറില്‍ തിരിച്ചടിയാകുമോയെന്ന ഭയമാണ് നിതീഷ് കുമാറിനെ ഇന്ത്യ മുന്നണിയില്‍ നിന്നും അടര്‍ത്താനുളള ബിജെപിയുടെ നീക്കം. സോഷ്യലിസ്റ്റ് നേതാവ് കര്‍പ്പൂരി ഠാക്കൂറിന് ബിജെപി ഭാരത രത്ന പ്രഖ്യാപിച്ചതിന് പിന്നാലെയാണ് വാര്‍ത്തകള്‍ പുറത്ത് വരുന്നത്. മാത്രമല്ല, ആര്‍ജെഡിയുടെ കുടുംബവാഴ്ചയെ വിമര്‍ശിച്ചതും എന്‍ഡിഎയിലേക്കെന്ന സൂചന ശക്തമായി. നിതീഷ് കുമാര്‍ എന്‍ഡിഎയിലേക്ക് അടുക്കുന്നുവെന്ന അഭ്യൂഹങ്ങള്‍ക്കിടെ ചേര്‍ന്ന ബീഹാര്‍ കാബിനറ്റ് വെറും 15 മിനിട്ട് മാത്രമാണ് നീണ്ട് നിന്നത്. ഉപമുഖ്യമന്ത്രി തേജസ്വി യാദവിന്റെയും ലാലുപ്രസാദ് യാദവിന്റെയും നേതൃത്വത്തില്‍ ആര്‍ജെഡി അംഗങ്ങളും നേതാക്കളും യോഗത്തില്‍ പങ്കെടുത്തു. സാധാരണ യോഗം മാത്രമാണ് ചേര്‍ന്നതെന്നും സര്‍ക്കാരില്‍ പ്രശ്‌നമില്ലെന്നും യോഗശേഷം ആര്‍ജെഡി നേതാക്കള്‍ പ്രതികരിച്ചു.