India
പുതിയ ഥാർ വാങ്ങി വെടിവച്ച് ആഘോഷം; പോലീസിനെ പ്രതിക്കൂട്ടിലാക്കി സോഷ്യല്‍ മീഡിയ
പുതിയ കാർ വാങ്ങിയത് വെടിവച്ച് ആഘോഷിച്ച യുവാവിൻ്റെ വീഡിയോക്കെതിരെ വിമർശനം ശക്തമാകുന്നു. മഹീന്ദ്ര ഥാർ വാങ്ങിയത് ബന്ധുവിനൊപ്പം ആകാശത്തേക്ക് വെടിവച്ച് ആഘോഷിക്കുന്നതാണ് ദൃശ്യങ്ങളിൽ ഉള്ളത്. മധ്യപ്രദേശിലാണ് സംഭവം.
മഹീന്ദ്ര ഷോറൂമിന് പുറത്തുവച്ചാണ് സംഭവം അരങ്ങേറിയത്. പുതുതായി വാങ്ങിയ അലങ്കരിച്ച ഥാറിനുള്ളിൽ ബന്ധുവിനോടൊപ്പം നിൽക്കുന്നയാൾ തോക്ക് ഉയർത്തി ആകാശത്തേക്ക് ഒന്നിലധികം തവണ വെടിയുതിർക്കുന്നതാണ് വീഡിയോ.
നവംബർ 18ന് പോസ്റ്റ് ചെയ്ത വൈറൽ വീഡിയോക്കെതിരെ വലിയ വിമർശനമാണ് സോഷ്യൽ മീഡിയയിൽ ഉയരുന്നത്. ഇത്തരമൊരു ആഘോഷത്തിന് ഒത്താശ ചെയ്ത മഹീന്ദ്ര ഷോറൂം ജീവനക്കാർക്കെതിരെയും രൂക്ഷ വിമർശനമാണ് ഉയരുന്നത്. റാലി ഡ്രൈവറും ഓട്ടോ പ്രേമിയുമായ രത്തൻ ധില്ലൻ എക്‌സിൽ റീപോസ്‌റ്റ് ചെയ്‌തതോടെയാണ് വീഡിയോ ചർച്ചയായി മാറിയത്. ഇതിന് ശേഷം കൂടുതൽ ആളുകളാണ് കുറ്റപ്പെടുത്തലുമായി രംഗത്തെത്തിയത്. മധ്യപ്രദേശ് പോലീസിനെ ടാഗ് ചെയ്തു കൊണ്ടായിരുന്നു ധില്ലൻ്റെ പോസ്റ്റ്.