India
കര്‍ഷകര്‍ക്ക് നേരെ തോക്കുചൂണ്ടിയ സംഭവം; ഐഎഎസ് ഉദ്യോഗസ്ഥ പൂജ ഖേഡ്കറിന്റെ അമ്മ അറസ്റ്റില്‍
മുംബൈ: സര്‍വീസില്‍ പ്രവേശിക്കാനായി വ്യാജ സര്‍ട്ടിഫിക്കറ്റ് സമര്‍പ്പിച്ചു എന്ന ആരോപണം നേരിടുന്ന ഐഎഎസ് ഉദ്യോഗസ്ഥ പൂജ ഖേഡ്കറിന്റെ അമ്മ അറസ്റ്റില്‍. കര്‍ഷകര്‍ക്കുനേരെ തോക്കു ചൂണ്ടി ഭീഷണിപ്പെടുത്തിയ സംഭവത്തില്‍ മനോരമ ഖേഡ്കറിനെ പുനെ പൊലീസ് ആണ് അറസ്റ്റ് ചെയ്തത്. റായ്ഗഡിലെ ഹോട്ടലില്‍ നിന്നാണ് മനോരമ ഖേഡ്കറിനെ കസ്റ്റഡിയിലെടുത്തത്.
പൂജ ഖേഡ്കറിനെതിരെ ആരോപണങ്ങള്‍ ഉയര്‍ന്നതിന് പിന്നാലെയാണ് മനോരമ ഖേഡ്കര്‍ കര്‍ഷകര്‍ക്ക് നേരെ തോക്കു ചൂണ്ടി ഭീഷണിപ്പെടുത്തുന്ന പഴയ ദൃശ്യങ്ങള്‍ പുറത്തുവന്നത്. ഇതിന് പിന്നാല ഒളിവില്‍ പോയ പൂജയുടെ മാതാപിതാക്കളെ കണ്ടെത്താനുള്ള തിരച്ചിലിലായിരുന്നു പൊലീസ്.
അതിനിടെയാണ് റായ്ഗഡിലെ ഹോട്ടലില്‍ നിന്ന് പിടികൂടിയത്. നേരത്തെ, വീഡിയോ പുറത്തുവന്നതിന് പിന്നാലെ കര്‍ഷകന്‍ നല്‍കിയ പരാതിയില്‍ മനോരമ ഖേഡ്കറിനെതിരെ കേസെടുത്തിരുന്നു. അനധികൃതമായി സ്വത്ത് സമ്പാദിച്ചു എന്ന ആരോപണത്തില്‍ പൂജയുടെ അച്ഛന്‍ ദിലീപ് ഖേഡ്കറിനെതിരെയും പൊലീസ് അന്വേഷണം നടത്തുമെന്നാണ് റിപ്പോര്‍ട്ടുകള്‍.