Kerala
പത്തനംതിട്ട സ്ഥാനാര്‍ത്ഥികളില്‍ സമ്പന്നന്‍ അനില്‍ ആന്റണി; തോമസ് ഐസക്കിന് 13 ലക്ഷത്തിന്റെ ആസ്തി
പത്തനംതിട്ട: പത്തനംതിട്ട ലോക്‌സഭാ മണ്ഡലത്തിലെ സ്ഥാനാര്‍ത്ഥികളില്‍ സമ്പന്നന്‍ എന്‍ഡിഎ സ്ഥാനാര്‍ത്ഥി അനില്‍ ആന്റണി. യുഡിഎഫ് സ്ഥാനാര്‍ത്ഥി ആന്റോ ആന്റണി രണ്ടാമതും എല്‍ഡിഎഫ് സ്ഥാനാര്‍ത്ഥി ഡോ. തോമസ് ഐസക് മൂന്നാം സ്ഥാനത്തുമാണ്. നാമനിര്‍ദ്ദേശ പത്രികയോടൊപ്പം സമര്‍പ്പിച്ച സത്യവാങ്ങ്മൂലത്തിലാണ് സ്ഥാനാര്‍ത്ഥികളുടെ സ്വത്ത് വിവരം ഉള്ളത്.
അനില്‍ ആന്റണിക്ക് വിദേശ ബാങ്കുകളിലടക്കം ഒരു കോടി പതിനാല് ലക്ഷത്തി അഞ്ഞൂറ്റി എഴുപത്തിയേഴ് രൂപയുടെ നിക്ഷേപമാണുള്ളത്. 50,000 രൂപയാണ് അനില്‍ ആന്റണിയുടെ കൈവശമുള്ളത്. യുഎസ്എ യിലെ ധനകാര്യ സ്ഥാപനങ്ങളില്‍ 5.38 ലക്ഷം രൂപയുടെ നിക്ഷേപം അനില്‍ ആന്റണിക്കുണ്ട്. ന്യൂഡല്‍ഹി തിരുവനന്തപുരം എന്നിവിടങ്ങളിലെ വിവിധ ബാങ്ക് ശാഖകളിലെ നിക്ഷേപങ്ങളുടെ വിവരങ്ങളും സത്യവാങ്ങ്മൂലത്തില്‍ വ്യക്തമാക്കിയിട്ടുണ്ട്. യുഎസിലെ സ്റ്റാന്‍ഫോര്‍ഡ് യൂണിവേഴ്‌സിറ്റിയില്‍ നിന്നും മാസ്റ്റര്‍ ഓഫ് സയന്‍സ് ഇന്‍ മാനേജ്‌മെന്റ് സയന്‍സ് & എഞ്ചിനീയറിങ്ങ് ആണ് 38 കാരനായ അനില്‍ ആന്റണിയുടെ വിദ്യാഭ്യാസ യോഗ്യത.